Një ngjarje e rëndë ka tronditur Malishevën e Kosovës, ku një 25-vjeçare, e cila ishte në javën e 34-t të shtatzënisë, është vrarë me armë zjarri. Ngjarja ka ndodhur mbrëmjen e së dielës në fshatin Kërvasari.

Viktima është identifikuar si Jetlira Foniqi, 25 vjeçe. Për ngjarjen dyshohet se është përgjegjës bashkëshorti i saj, 26 vjeç, i cili është gjetur i plagosur në dhomën e gjumit të çiftit dhe ndodhet në gjendje shumë të rëndë shëndetësore në spital.

Zëdhënësja e Policisë së Kosovës për rajonin e Gjakovës, Vlera Krasniqi, ka deklaruar se njësitë policore kanë dalë menjëherë në vendngjarje, ku në një dhomë gjumi kanë gjetur dy persona të plagosur, një burrë dhe bashkëshorten e tij.

Ndërkohë, Qendra Klinike Universitare e Kosovës ka dhënë detaje për gjendjen e dy personave të dërguar në Qendrën Emergjente.

“Njëri prej personave të pranuar, femër, 25-vjeçare, ka arritur në Qendrën Emergjente pa shenja jete, me plagë të shkaktuara nga arma e zjarrit. Personi tjetër, mashkull, 26-vjeçar, është pranuar me plagë të shkaktuara nga arma e zjarrit dhe aktualisht është duke marrë trajtim mjekësor në Qendrën Emergjente. Gjendja e tij shëndetësore raportohet të jetë shumë e rëndë”, thuhet në njoftimin e QKUK-së.

Sipas informacioneve paraprake, gruaja ishte 34 javëshe shtatzënë në momentin e ngjarjes, duke e bërë tragjedinë edhe më të rëndë.

Autoritetet kanë nisur hetimet për të zbardhur plotësisht rrethanat e ngjarjes, ndërsa ende nuk është bërë i ditur motivi i krimit.

Policia dhe organet e drejtësisë po vijojnë veprimet hetimore për të përcaktuar dinamikën e saktë të ngjarjes dhe përgjegjësinë penale.