Detaje të reja janë bërë të ditura nga ngjarja e rëndë që tronditi mbrëmjen e së dielës Malishevën e Kosovës, ku humbi jetën 25-vjeçarja shtatzënë Jetlira Foniqi.

Prokuroria Themelore në Gjakovë ka bërë të ditur se bashkëshorti i viktimës është personi i dyshuar për ngjarjen. Edhe ai ka pësuar plagë të rënda nga arma e zjarrit dhe ndodhet në Qendrën Klinike Universitare të Kosovës, në gjendje të rëndë dhe kritike për jetën.

“Një person i gjinisë femërore, bashkëshortja e personit të dyshuar, si pasojë e plagëve nga arma e zjarrit ka ndërruar jetë në QKUK”, thuhet në njoftimin e Prokurorisë Themelore në Gjakovë.

Për gjendjen e bashkëshortit, Prokuroria njofton: “Personi i gjinisë mashkullore, po ashtu ka pësuar plagë të rënda nga arma e zjarrit, i cili është dërguar për trajtim mjekësor dhe sipas njoftimit nga QKUK, i njëjti është në gjendje të rëndë dhe kritike për jetën”.

Viktima ishte 34 javëshe shtatzënë. Pavarësisht masave reanimatore të ndërmarra nga ekipi mjekësor, ajo nuk ka mundur t’u mbijetojë plagëve të marra dhe ka ndërruar jetë në QKUK.

Pas ngjarjes, Prokurori i Shtetit ka dalë në vendin e ngjarjes, ndërsa me urdhër të tij trupi i pajetë i 25-vjeçares është dërguar në Institutin e Mjekësisë Ligjore në Prishtinë, ku do t’i nënshtrohet autopsisë.

Për rastin është iniciuar procedurë për veprat penale “Vrasja e rëndë” dhe “Mbajtja në pronësi, kontroll ose posedim të paautorizuar të armëve”.

Prokuroria, në koordinim me Policinë e Kosovës, ka bërë të ditur se po ndërmerr veprimet e nevojshme hetimore për ndriçimin e plotë të rrethanave të ngjarjes dhe sigurimin e provave relevante.

Motivi dhe dinamika e saktë e ngjarjes mbeten ende nën hetim.