Situata nga zjarret në Qarkun e Dibrës paraqitet më e qetë në nisje të kësaj jave. Vatrat që ishin aktive në Dibër, Klos dhe Mat janë izoluar, ndërsa vijojnë të monitorohen për të shmangur riaktivizimin e tyre.

Sipas të dhënave, në disa prej vatrave ka ende trungje të ndezura, ndaj strukturat në terren po mbajnë situatën nën kontroll.

E vetmja vatër që vijon të jetë aktive aktualisht është ajo në Ballenjë të Martaneshit. Zjarri ka nisur në anën e Librazhdit dhe më pas është përhapur drejt territorit të Bulqizës.

Prefekti i Qarkut Dibër, Nexhbedin Shehu, deklaroi se në terren ndodhen dhjetëra forca, të cilat po punojnë për të parandaluar avancimin e flakëve.

Duke marrë shkas nga situata e krijuar nga zjarret në të gjithë vendin, Shehu u ka bërë apel banorëve të tregohen të kujdesshëm dhe të mos bëhen shkak për ndezjen e zjarreve, qoftë edhe pa dashje.

Qarku i Dibrës është ndër zonat që përballet më shpesh me zjarre gjatë periudhës së verës, edhe për shkak të sipërfaqes së madhe pyjore që karakterizon territorin.