Dekani i Fakultetit të Ekonomisë, Dhori Kule thotë se pritet që viti i ri akademik të nisë me mësimin në auditore.

Në një prononcim për mediat, ai u ka bërë thirrje studentëve aktualë si dhe maturantëve që do të hyjnë në fakultet, të marrin dozën e vaksinës.

Kule thotë se në Fakultetin e Ekonomisë kanë humbur jetën dy profesoresha dhe një student për shkak të koronavirusit, ndaj kjo duhet të shërbejë si një indicie për të gjithë studentët që të vaksinohen.

“Në Fakultetin e Ekonomisë kanë humbur jetën dy profesoresha dhe një student për shkak të Covid-19. U kemi bërë thirrje studentëve që të vaksinohen, u kemi dërguar mesazhe dhe i kemi kontaktuar përmes emaileve. Po presim që gjate shtatorit të jemi në kontakt, që të shfrytëzojnë muajt e hapur qe shërbimi mjekesore ka vënë në dispozicion për të bërë vaksinën. Nuk kemi statistika se sa studenta nuk e kanë bërë vaksinën. Po të njëjtën gjë duhet të bëjnë edhe maturantët. Kam bindjen që ata e mirëkuptojnë dhe e dinë që vaksinimi është për të mirën e tyre dhe të të afërmve të tyre. Presim që të fillojmë mësim fizikisht. Mësimi online ishte nga halli. U munduan stafet tona por nuk zëvendësohen dot me auditorin. Presim që të fillojë dhe vaksinimi. Kjo ka nevojë të legjitimohet, mësimi online nuk është parashikuar në ligjin e arsimit të lartë” – tha Kule.