Lufta Rusi-Ukrainë ka shtuar rreziqet edhe për ekonominë shqiptare dhe do të frenojë ritmet e rritjes së saj. Së fundmi është Fondi Monetar Ndërkombëtar në raportin e Prillit të ‘Pasqyrës ekonomike Globale’ që ka zhvlerësuar projeksionet për një rritje ekonomike për Shqipërinë në 2% nga 4.5% që ishte planifikuar në muajin tetor duke e përgjysmuar rritjen ekonomike për vendin tonë. Ritmet e rritjes sipas FMN pritet të jenë të ulëta edhe në vitin 2023, me 2.8% dhe do të përshpejtohet lehtë në 3.4% deri në vitin 2027.

Në parashikimet e bëra nga ky institucion ndërkombëtar financiar Shqipëria vlerësohet se do të ketë rritjen më të ulët në rajon. Për Malin e Zi vlerësimi është 3.8, për Bosnjë Hercegovinën 2.4%, për Kosovën 2.8%. Maqedonia e Veriut pritet të ketë një rritje prej 3.2%. Më pak pritet ta ndiejë luftën Serbia, që vlerësohet se do të zgjerohet me 3.5% këtë vit dhe do të përshpejtohet në 4% vitet në vijim.

Më herët edhe institucione të tjera ndërkombëtare financiare rishikuan me ulje pritshmëritë për rritjen ekonomike të Shqipërisë për shkak të luftës Rusi-Ukrainë dhe pasigurinë sesa do të zgjas kjo luftë.

Banka Botërore uli pritshmërinë për rritjen ekonomike në 3.2% nga 3.8% që kishte parashikuar në fillim të këtij viti, duke iu afruar pritshmërive të institucioneve të tjera vendase e të huaja.