Në vitin 2017, në dhjetë supermarkete gjermane në Bavari u zbulua një sasi prej të paktën 200 kg kokainë. Punonjësit e supermarketeve e gjetën drogën të fshehur në kutitë e bananeve. Lajmi bëri bujë jo vetëm në median gjermane, por edhe në Shqipëri.

Banda që trafikonte kokainën përbëhej nga shqiptarë. Policia gjermane nisi hetimet duke gjurmuar kutitë e bananeve. Hetimi i çoi ata në Amerikën Latine. Trafikantët e fusnin drogën në kutitë e bananeve. Më pas ngarkesa vinte nga Ekuadori për në portin e Hamburgut. Prej andej shpërndahej me kamionë në magazinat ku frutat piqeshin plotësisht. Shqiptarët mbërrinin te këto magazina dhe merrnin lëndën narkotike. Pasi mësuan skemën, policia gjermane arrestoi 14 persona dhe ata dolën në gjyq për trafikun e të paktën 1.2 ton kokainë.Por policët gjermanë nuk u ndalën me kaq. Hetimet vazhduan edhe më tej. Sipas Policisë Bavareze, ata zbuluan një tjetër rrjet shqiptar, i cili e shpërndante drogën nga Amerika e Jugut drejt tregjeve europiane. Ata përdornin portin e Antverpës dhe bazën e tyre e kishin në Belgjikë.

Falë informacioneve nga Gjermania, autoritetet belge kanë goditur bandën shqiptare, të cilën revista gjermane Spiegel e quan kartel.

“Tonelata kokainë, vite kërkim për të dhëna nga Bavaria në Amerikën e Jugut, hetime të kujdesshme dhe tani vjen suksesi: falë informacioneve decizive nga zyrtarët e Policisë Kriminale Bavareze, policia belge ka arrestuar dy prej lordëve më të mëdhenj të drogës në Europë. Më 15 dhe 16 dhjetor, forcat belge bastisën 20 banesa dhe arrestuan 17 persona në kuadër të operacionit në shkallë të gjerë të quajtur ‘Action Day’. Në total u arrestuan 17 persona, u kapën qindra mijëra euro dhe u konfiskuan 187 kg kokainë,” thekson policia bavareze.

Se cilët janë lordët e drogës, kjo nuk thuhet. Ajo që dihet është se në këtë operacion është arrestuar nipi i deputetit socialist, Rrahman Rraja. Bëhet fjalë për shtetasin Ramazan Rraja, një emër i njohur për autoritetet shqiptare. Në pranga ka rënë edhe Fjoralb Rraja.

Në çdo vend tjetër normal, ky lajm do kishte shkaktuar një tërmet në qeverisje. Në Shqipëri, goditja e karteleve, edhe kur ato kanë fije të lidhura me emra të qeverisjes socialist, kalon pa zhurmë.