Deputeti i Partisë Demokratike, Agron Shehaj ka komentuar përplasjen e djeshme me kryeministrin Edi Rama në Kuvend për çështjen e inceneratorëve.

Shehaj e akuzoi kryeministrin se fshihej pas kompanisë offshore të Inceneratorit të Tiranës, ndërsa kreu i qeverisë iu kthye ashpër duke iu drejtuar me fjalët “je idiot apo bën vetë”.

Në një intervistë për News24, Shehaj tha se ofendimet dhe fyerjet e Ramës janë strategji kur nuk ka argumente për t’u kundërpërgjigjur.

Shehaj: Para disa ditësh SPAK shpalli në kërkim për korrupsion pronarin e Inceneratorin e Tiranës. Ndërkohë qeveria vijon e paguan këtë zotëri, vetëm në një muaj ky zotëri ka marrë rreth 1 mln euro nga bashkia e Tiranës. Arsyeja e vetme që një qeveri ka nënshkruar një kontratë korruptive me një subjekt off shore në Holandë dhe vijon ta paguajë, ka vetëm një arsye, nëse pas qëndron kryeministri. kjo ishte çështja që ngrita.

Unë kërkova shpjegime bazuar në logjikë dhe fakte. Kjo ndodhi dje. Përgjigja që mora ishte fyerje e ofendime. Nuk është hera e parë nga ana e tij. Është strategji kur nuk ke çfarë thua për çështjen vërsulju atij që flet.