Ministri i Brendshëm, Taulant Balla, ka njoftuar se fokusi i policisë do të jetë edhe në luftën kundër krimeve ekonomike. Në një reagim, Balla ka thirrur për një përqendrim të veçantë në luftën kundër evazionit fiskal, kontrabandës, krimeve kibernetike dhe piraterisë.

Balla shprehu nevojën për organizim të veprimtarive ekonomike të licencuara, duke theksuar rëndësinë e mbajtjes së detyrimeve fiskale ndaj shtetit dhe respektimin e të drejtave të autorit. Ai gjithashtu theksoi se bashkëpunimi dhe koordinimi i mirë mes Policisë së Shtetit dhe agjencive të tjera ligjzbatuese janë të domosdoshme për të luftuar krimet ekonomike.

Në reagimin e tij, ministri përgëzoi Drejtorinë e Policisë Tiranë për përpjekjet në goditjen e aktiviteteve kriminale ekonomike dhe e vlerësoi fillimin e vitit të ri si një hap pozitiv në këtë drejtim.

“Organizimi i veprimtarive ekonomike të paligjshme, të paliçensuara, të cilat shmangin detyrimet fiskale ndaj shtetit dhe vjedhin të drejtat e autorit nga operatorë të tjerë të ligjshëm duhet të vijojë të jetë në fokusin e strukturave kundër krimit ekonomik në të gjithë territorin. Rruga e pakthyeshme drejt anëtarësimit në Bashkimin Europian kërkon një koordinim edhe më të mirë mes Policisë së Shtetit dhe agjencive të tjera ligjzbatuese në luftën kundër krimeve ekonomike, evazionit, kontrabandës, krimeve kibernetike, piraterisë etj. Përgëzime Drejtorisë së Policisë Tiranë për fillimin e mbarë të këtij viti në goditjen e aktiviteteve kriminale të kësaj natyre.”, thuhet në reagimin e Ballës.