Kryeministri i Kosovës, Albin Kurti, ka prezantuar prioritete të reja për vitin 2024, duke theksuar se reforma në drejtësi do të jetë një nga fokuset kryesore. Ai njoftoi se gjatë këtij viti do të themelohet byroja për konfiskimin civil dhe do të vijojë puna për task-forcën antikorrupsion.

“Reforma në drejtësi është prioritet i qeverisë, andaj ajo do të vazhdojë të jetë e tillë. Vetingu po merr rrugë, pas aktgjykimit të Gjykatës Kushtetuese. Ky proces është domosdoshmëri që po na dëshmohet çdo ditë, krahas tij dhe presim prej 11 muajsh edhe vendimin e Gjykatës Kushtetuese për Ligjin për byronë shtetërore për konfiskimin e pasurisë së pajustifikueshme”, tha Kurti gjatë prezantimit të prioriteteve të qeverisë.

Në lidhje me situatën e sigurisë në Kosovë, kryeministri Kurti shtoi se rritja e kapaciteteve mbrojtëse do të jetë prioritet i parë i ministrisë së Mbrojtës. Ai informoi se kanë marrë konfirmimin për blerjen e sistemit antitank Javelin nga Shtetet e Bashkuara të Amerikës.

Kurti gjithashtu theksoi se në fushën ekonomike, Ministria e Financave do të vazhdojë me reformën e pensioneve. Në politikën e jashtme, prioritet mbetet anëtarësimi i Kosovës në Këshillin e Evropës.

“Këtë vit, rritja e kapaciteteve mbrojtëse do të jetë prioritet i parë i ministrisë së Mbrojtës. Për një fillim të mbarë, në fillim të këtij viti ne morëm konfirmimin nga DASh se ka pranuar kërkesën tonë për të blerë sistemin antitank Javelin” , tha Kurti.