Kushtrim Kokalla, i arrestuar si i dyshuar për përfshirje në vrasjen e Liridona Ademajt, ka pranuar në dëshmi se Naim Murseli e ka lutur prej tij prej afër që të kryejë vrasjen e 30-vjeçares.

Kokalla, pjesëtar i Forcës së Sigurisë së Kosovës dhe familjar i Murselit, ka deklaruar se Murseli ka planifikuar më herët edhe vrasjen e gruas së tij dhe i ka ofruar para për këtë.

Megjithatë, ai mohon se ka pranuar të kryejë këtë veprim dhe ka thënë Naim Murselit që mos ta kërkojë më për këtë punë. Kokalla gjithashtu ka dhënë detaje rreth takimeve mes Naim Murselit dhe Granit Plavës, i cili është tjetri i dyshuar për vrasjen e Liridona Ademajt.

Ai jep informacione të tjera për komunikimin dhe ngjarjet në ditën e vrasjes së Liridona Ademajt dhe ditën e varrosjes së saj.

“Vlen të ceket se Naimi prej afër një viti mua më ka lutur që të e kryej këtë vrasje. Atëherë unë i kam thënë se nuk vjen në shprehje që të bëj këtë punë dhe mos më thuaj më asnjëherë”, thuhet në dëshminë e Kokallës.