Një zjarr ka shpërthyer në orët e para të mëngjesit të kësaj të diele në urgjencën e re të QSUT-së. Shkaku i flakëve është një defekt në bateritë e serverëve, të cilat ndodheshin në katin -1. Forcat zjarrfikëse kanë reaguar menjëherë dhe kanë vendosur flakët nën kontroll, duke evakuuar të gjithë pacientët, të cilët aktualisht ndodhen në ambiente të tjera të QSUT-së dhe po marrin trajtimin normalisht.

Drejtoresha e QSUT, Albana Fico, në një deklaratë për mediat, siguroi familjarët se asnjë prej pacientëve nuk ka pasur përkeqësim të gjendjes shëndetësore. “Kemi lëvizur pacientët brenda QSUT për siguri, dhe ata po trajtohen pa ndonjë ndryshim të parametrave të tyre,” tha Fico.

Pas një mbledhjeje me ministren e Shëndetësisë, është vendosur që rastet e urgjencave do të devijojnë tek spitali i Traumës dhe spitali ‘Shefqet Ndroqi’. Forcat zjarrfikëse kanë evakuuar edhe personelin, dhe nuk raportohet të ketë probleme me pajisjet shëndetësore.

Qendra Spitalore Universitare Nënë Tereza ka reaguar duke theksuar se situata është nën kontroll dhe pacientët janë të gjithë jashtë rrezikut për jetën. Grupi hetimor është duke punuar për zbardhjen e plotë të rrethanave të ngjarjes. Urgjenca, e inauguruar një vit më parë, vijon të monitorohet për të siguruar që gjendja të mbetet e qetë.