Kryeministri Edi Rama ka prezantuar sot projektet fituese të para të Korporatës Shqiptare të Investimeve (AIC), që synojnë transformimin e infrastrukturës publike në vend sipas modeleve më të mira europiane. Përmes një postimi në rrjetet sociale, Rama njoftoi se këto projekte janë rezultat i një konkursi ndërkombëtar dhe do të përfshijnë ndërtimin e një kompleksi administrativ, zyrat e reja të Kadastrës Shtetërore, si dhe dy godina multifunksionale, duke krijuar një platformë të re për zhvillimin e pronës publike dhe përmirësimin e shërbimeve publike në përputhje me vizionin “Shqipëria 2030”.

Juria ndërkombëtare ka përzgjedhur disa studio arkitekturore për realizimin e këtyre projekteve. Për lotin e parë, që përfshin strukturat administrative, u zgjodhën studiot COLDEFY nga Franca, ndërsa për lotin e dytë u përzgjodhën ANDREA CAPUTO nga Italia dhe SO-IL nga SHBA. Për grupin e dytë, për lotet një dhe dy, u zgjodh studio italiane BAUKUH.

Ndërtimet do të realizohen në disa zona kyçe të Tiranës, përfshirë Parkun Olimpik, zonën pranë Komunës së Parisit, pranë Harry Fultz, ATSH-së dhe në zonën e 21 Dhjetorit. Këto projekte synojnë të eliminojnë qiratë e shtrenjta që aktualisht paguhen për zyrat dhe institucionet publike, duke ofruar një zgjidhje më të qëndrueshme për shfrytëzimin e pronës publike. Qeveria ka hapur tashmë garën ndërkombëtare për realizimin e këtyre projekteve, duke i dhënë një tjetër dimension zhvillimit urban të Tiranës dhe administratës shtetërore.