Këngëtarja e njohur shqiptare, Rita Ora, ka ndarë së fundmi disa detaje mbi marrëdhënien e saj me bashkëshortin, Taika Waititi-n. Çifti ka qenë shumë i hapur me fansat lidhur me jetën e tyre private, duke ndarë momente nga përditshmëria dhe çastet që kalojnë së bashku.
Gjatë festës pas ndarjes së çmimeve “Emmy Awards 2024”, Rita ka bërë një koment të veçantë për marrëdhënien e saj me regjisorin dhe producentin e njohur. “Ne frymëzojmë njëri-tjetrin. Unë vij nga muzika dhe ai është skenarist, regjisor dhe producent, kështu që është një shtëpi plot ide. Ne jemi të dy shenja zjarri, gjithashtu. Pra, është thjesht zjarr,” u shpreh ajo.
Sipas revistës People, Rita ishte në ceremoninë e çmimeve për të mbështetur bashkëshortin e saj, i cili ishte i nominuar për disa kategori për seritë komike “Reservation Dogs” dhe “What We Do in the Shadows”. Ora dhe Waititi u martuan në gusht të vitit 2022 në një ceremoni private.
