Gjatë seancës parlamentare, tensionet u rritën ndjeshëm teksa deputeti i Partisë Socialiste, Petro Koçi, akuzoi Partinë Demokratike për marrje urdhrash nga “tezga e Sali Berishës”, duke i mbrojtur interesat e tij. Gjatë fjalës së tij, Koçi kritikoi opozitën për dhunën dhe kaosin e shkaktuar për qëllime politike.

Në këtë moment, deputetja e PD-së, Albana Vokshi, u ngrit nga vendi dhe tentoi t’i afrohej Koçit me qëllim për ta përballur, duke e akuzuar atë për fjalët e tij. Por ndërhyrja e Gardës e ndaloi Vokshin, duke parandaluar një përplasje fizike mes dy deputetëve.

Kryeparlamentarja Elisa Spiropali ndërhyri menjëherë, duke i tërhequr vëmendjen Vokshit dhe duke i kujtuar se ajo nuk kishte të drejtë të dhunonte kolegët e saj. Spiropali theksoi se një sjellje e tillë nuk ishte e pranueshme, veçanërisht për një grua deputete. “Kjo nuk është sjellje prej gruaje. Kjo nuk është sjellje e pranueshme prej jush dhe kolegeve të tjera!” – tha Spiropali, duke qetësuar përkohësisht situatën.

Tensionet në Kuvend kanë vijuar, ndërsa përplasjet verbale dhe fizike mes deputetëve tregojnë një klimë gjithnjë e më të acaruar në arenën politike shqiptare.