Deputeti i Partisë Socialiste, Erion Braçe, ka reaguar me tone të ashpra ndaj deputetëve të Partisë Demokratike, të cilët po krijonin kaos në sallën e Kuvendit. Gjatë fjalës së tij, Braçe u ndal te gardhi metalik që është vendosur jashtë sallës, duke bërë një rikthim në ngjarjet e vitit 1997, kur ai u fut në Kuvend për herë të parë, siç tha, “i larë në gjak”.
Braçe i bëri thirrje PD-së që të lejonte deputetët e saj të pashkualifikuar të merrnin pjesë në seancë, duke theksuar se opozita po përplaset me vetveten, jo me Kuvendin apo me mazhorancën. “Këtu ka dy botë: një botë që punon dhe shikon nga e ardhmja, dhe një botë që kërkon me çdo kusht të mbajë të shkuarën”, tha Braçe.
Në një krahasim të fortë me situatën aktuale, Braçe përkujtoi ngjarjet e vitit 1997, kur ai dhe disa të tjerë nga Partia Socialiste ishin zgjedhur deputetë në një kohë kur vendi ishte në kaos dhe Kuvendi ishte një arenë tensioni. Ai kujtoi se kur kishte hyrë për herë të parë në Kuvend, Tirana ishte në shtet-rrethim, me drejtuesin e SHIK-ut dhe kryetarin e PD-së të cilët, sipas tij, sulmonin socialistët dhe po përgatisnin një “grusht shteti”. Ai e krahasoi këtë me sulmet e sotme ndaj SHBA nga disa figura të opozitës, duke e quajtur situatën “komike”.
Me këtë deklaratë, Braçe duket se kërkoi të sjellë në vëmendje se, sipas tij, ka një vijimësi të qasjes kaotike të PD-së, si në të kaluarën ashtu edhe në të tashmen.
