Ferrari ka prezantuar zyrtarisht makinën e saj të parë plotësisht elektrike, duke shënuar një moment historik për markën ikonike italiane. Por debutimi i modelit të ri, të quajtur Ferrari Luce, është shoqëruar me reagime të përziera dhe kritika të forta nga industria automobilistike.

Makina u prezantua fillimisht në rezidencën verore papnore në Castel Gandolfo, pranë Romës, përpara Presidentit të Italisë dhe Papa Leoni XIV. Gjatë prezantimit, presidenti i Ferrari-t, John Elkann, i shpjegoi Papës detajet teknike të automjetit, ndërsa ky i fundit provoi edhe timonin e makinës.

“A është kjo Ferrari i parë me katër dyer?”, pyeti Papa Leoni XIV, ndërsa Elkann u përgjigj se modeli i ri është Ferrari i parë me pesë ulëse.

Sipas të dhënave teknike, “Luce” prodhon rreth 1 mijë kuaj-fuqi dhe arrin shpejtësinë nga 0 në 100 kilometra në orë për vetëm 2.5 sekonda. Automjeti ka një autonomi mbi 530 kilometra dhe përdor katër motorë elektrikë, nga një për secilën rrotë. Në tregun italian, çmimi i tij raportohet të arrijë rreth 500 mijë euro.

Megjithatë, pritja në treg nuk ka qenë pozitive. Aksionet e Ferrari-t ranë me 8.4% në bursën e Milanos, ndërsa në tregjet amerikane u regjistrua një rënie prej 5.3%.

Kritikat janë fokusuar kryesisht tek dizajni dhe identiteti i modelit të ri. Ekspertë të industrisë automobilistike kanë ngritur pikëpyetje nëse makina ruan “shpirtin Ferrari”, duke theksuar se mungesa e motorit tradicional dhe vendosja e baterive nën dysheme kanë ndryshuar ndjeshëm siluetën klasike sportive të markës.

“Makina nuk ka atë pamjen tipike të Ferrarit”, u shpreh një ekspert i industrisë automobilistike, duke shtuar se modeli duket më i lartë dhe më pak dinamik krahasuar me makinat tradicionale të kompanisë.

Disa kritikë të tjerë e kanë cilësuar “Luce” si “ndoshta modelin më të diskutueshëm në historinë e Ferrari-t”, duke vënë në dyshim çmimin e lartë dhe pozicionimin e saj në një treg gjithnjë e më konkurrues.

Prezantimi i modelit vjen në një periudhë kur industria globale e automobilëve po përballet me tranzicionin e vështirë drejt elektrifikimit. Edhe pse Bashkimi Europian synon ulje drastike të emetimeve deri në vitin 2035, shumë prodhues kanë ngadalësuar planet e tyre për shkak të kostove të larta dhe kërkesës së paqëndrueshme.

Sipas Agjencia Ndërkombëtare e Energjisë, shitjet globale të makinave elektrike kanë arritur në 20 milionë njësi gjatë vitit të kaluar, duke përfaqësuar rreth një në katër makina të shitura në botë.

Pavarësisht investimeve miliardëshe në teknologjinë elektrike, sfida për Ferrari-n dhe prodhuesit e tjerë të luksit mbetet ruajtja e identitetit sportiv në një epokë të re të automobilizmit.