Më 9 Shtator, Gjykata e Tiranës ka vendosur masën e sigurisë “arrest në burg” për Klajdi Hakën, kushëririn e Marklen Hakës, i cili u arrestua gjatë një operacioni policor në Nikël më 7 Shtator. Gjatë seancës gjyqësore, 21-vjeçari Klajdi Haka refuzoi të japë deklarata ose të shpjegojë akuzat e ngritura ndaj tij, që përfshijnë “armëmbajtje pa leje” dhe “përkrahje të autorit të krimit.”

Arrestimi i Klajdi Hakës u bë pas një operacioni të policisë për kapjen e kushëririt të tij, Marklen Hakës, i cili u gjet i fshehur në banesën e Klajdit. Gjatë kontrollit në banesën e 21-vjeçarit, shërbimet policore zbuluan një armë zjarri, për çka Klajdi Haka u akuzua për armëmbajtje pa leje.

Një ditë më parë, Gjykata e Posaçme Antikorrupsion kishte lënë në fuqi masën “arrest në burg” për Marklen Hakën, i cili është akuzuar për disa vepra të rënda kriminale, përfshirë një atentat të dështuar ndaj Durim Bamit. Marklen Haka ka mohuar akuzat, duke dhënë një alibi për vendndodhjen e tij në momentin e krimit dhe ka deklaruar se nuk ka përdorur aplikacionin e koduar SKY.

Marklen Haka është i njohur për policinë, pasi ka qenë i përfshirë në disa ngjarje kriminale ndër vite, duke përfshirë atentatin ndaj Gentjan Bejtjas, i cili u vra më 15 Mars në Fushë-Krujë, si dhe për vrasjen e një biznesmeni të kromit një dekadë më parë. Haka ka qenë disa herë i arrestuar, dënuar dhe më pas liruar nga autoritetet.