Ngjarjet brenda shtëpisë së Big Brother VIP Albania vazhdojnë të mbajnë publikun të fokusuar, ndërsa formatit i është shtuar edhe një program radiofonik që transmetohet drejtpërdrejt nga brenda shtëpisë.

Në episodin më të fundit në Top Albania Radio, protagonisti ishte finalisti Mateo Borri, i cili ndau mendimet e tij për rrugëtimin në këtë eksperiencë.

E moderuar nga Heidi Baci, biseda nisi me pyetjen nëse ai e kishte pritur të arrinte deri në finale.

“Duke menduar fillimet e mia, nuk e prisja… por duke iu afruar fundit, deri diku e prisja,” u shpreh Mateo, duke shtuar se dinamika mes banorëve ndikon shumë në ecurinë e lojës.

I pyetur nëse kishte hyrë me strategji, ai u përgjigj qartë:
“Asnjë lloj strategjie… jam një tip që më pëlqen të sfidoj veten. Kam hyrë për ta jetuar këtë eksperiencë… Mateo Borri 100% real.”

Ai theksoi gjithashtu se energjia brenda shtëpisë jo gjithmonë i ka lejuar të tregojë anën e tij më pozitive.
“Ata që më njohin nga jashtë e dinë që pozitivitetin tim nuk e kam treguar dot prej energjisë negative,” tha ai.

Nga ana tjetër, Heidi Baci vuri në dukje se ky format shpesh nxjerr në pah edhe anët më të vështira të karakterit, ndërsa Mateo shtoi se përballja me situata të pazakonta është një nga sfidat më të mëdha të kësaj eksperience.