Irani ka kërkuar kompensim për dëmet që thotë se janë shkaktuar nga sulmet e Shteteve të Bashkuara dhe Izraelit, duke e vlerësuar koston totale direkte dhe indirekte në rreth 270 miliardë dollarë.

Teherani pretendon se goditjet kanë dëmtuar rëndë infrastrukturën energjetike, industriale dhe civile, përfshirë objekte nafte, gazsjellës, porte, aeroporte, universitete dhe spitale. Sipas autoriteteve iraniane, procesi i rikuperimit do të zgjasë me vite.

Ambasadori i Iranit në OKB deklaroi se disa vende të rajonit duhet të mbajnë përgjegjësi financiare, duke pretenduar se territori i tyre është përdorur për sulme ndaj Iranit.

Zëdhënësja e qeverisë iraniane, Fatemeh Mohajerani, tha se çështja e kompensimit është ngritur edhe në bisedimet me SHBA-në, ndërsa shtoi se vendi po vlerëson ende shkallën e plotë të dëmeve.

Irani po shqyrton gjithashtu vendosjen e një tarife tranziti në Ngushticën e Hormuzit, një nga rrugët më strategjike të transportit të naftës në botë, duke e lidhur këtë me presionin diplomatik në negociata.

Ndërkohë, zyrtarë iranianë kanë theksuar se pavarësisht goditjeve dhe vështirësive ekonomike, Teherani nuk synon të bëjë lëshime të mëdha në çështjet kyçe të negociatave, përfshirë programin bërthamor dhe kontrollin e rrugëve detare strategjike.