Avokati Spartak Ngjela ka ndarë detaje nga jeta e tij personale gjatë një interviste në emisionin “Ftesë në 5” me Bieta Sulo.

Ngjela u shpreh se dashuria e parë i ka ndodhur në moshën 19-vjeçare dhe, sipas tij, kjo ka qenë ndjenja e vetme e fortë emocionale që ka ruajtur ndër vite.

“Të jemi të qartë, në moshën 19-vjeçare jam dashuruar për herë të parë! Ato të tjerat janë shpërthime erotike, dashuri është ajo që të mban në mendim…”, u shpreh ai, duke shtuar se kjo është një ndjesi që, sipas tij, e përjeton më shumë burri.

I pyetur për faktin nëse i ka mbetur peng që nuk ka fëmijë, Ngjela tha se vendimi i tij lidhet me periudhën kur doli nga burgu në moshën 40-vjeçare dhe me frikën se nuk do të mund të ishte pranë një fëmije për një kohë të gjatë.

“Si mund ta bëja unë një fëmijë, kur do të isha të paktën 42 vjeç? Nga kjo moshë e lart ekziston rreziku që mund të vdesësh në çdo moment… Nuk doja të lija një fëmijë jetim”, tha ai.

Ngjela shtoi se kjo ka qenë një vendim i menduar si nga ana njerëzore, ashtu edhe nga përvoja e tij personale e jetës.