Detaje të reja kanë dalë në dritë nga ngjarja e rëndë e ndodhur në Kurbin, ku mbeti i vrarë me armë zjarri 40-vjeçari Ilirjan Lika.

Sipas informacioneve paraprake, viktima është qëlluar pranë hyrjes së pallatit ku banonte, menjëherë pasi kishte zbritur nga automjeti i tij. Pas të shtënave, autorët janë larguar me shpejtësi nga vendi i ngjarjes.

I plagosur rëndë, Lika është transportuar drejt Spitalit të Laçit për të marrë ndihmë mjekësore, por nuk ka mundur t’u mbijetojë plagëve të marra.

Burime nga grupi hetimor bëjnë me dije se autori i dyshuar është identifikuar dhe është shpallur në kërkim nga autoritetet. Ndërkohë, vijojnë kontrollet për kapjen e tij.

40-vjeçari ishte me origjinë nga Miloti dhe banonte në Laç. Sipas të dhënave të deritanishme, ai njihej me katër mbiemra, ndërsa e kaluara e tij po verifikohet nga hetuesit.

Dyshimet e para të grupit hetimor lidhen me periudhën që viktima ka qëndruar jashtë vendit, ndërsa ekspertët po punojnë për zbardhjen e plotë të rrethanave, identifikimin e personave të përfshirë dhe dokumentimin e motivit të atentatit.