Kreu i grupit parlamentar të Partisë Socialiste, Taulant Balla, ka reaguar pas përfundimit të seancës plenare, duke komentuar protestën e zhvilluar jashtë Kuvendit dhe përplasjet mes protestuesve dhe forcave të policisë.

Balla dënoi dhunën ndaj uniformave blu dhe shprehu solidaritet me katër efektivët e policisë që, sipas tij, u plagosën gjatë protestës.

“Shpreh solidaritetin e plotë me Policinë e Shtetit. Uroj shërimin e shpejtë të katër punonjësve të policisë së plagosur. Në një vend si Shqipëria, vend anëtar i NATO-s, nuk mund të tolerohet dhuna dhe çdo person që godet Policinë e Shtetit, godet vetë shtetin”, tha Balla.

Sipas tij, ngjarjet e regjistruara gjatë protestës nuk lidhen me shqetësimet e qytetarëve, por me një përpjekje për të krijuar tension dhe për të dëmtuar imazhin e vendit.

I pyetur nga gazetarët nëse hedhja e vezëve ndaj institucioneve konsiderohet dhunë, Balla u shpreh se situata nuk lidhet vetëm me këtë veprim, por me përplasjet më të gjera që, sipas tij, kanë sjellë dëmtime ndaj punonjësve të policisë.

Deputeti socialist akuzoi organizatorët e protestës se po tentojnë të rikthejnë skenarë të dhunës së viteve 1997-1998, duke paralajmëruar se pamjet e tilla mund të ndikojnë në imazhin e Shqipërisë dhe sezonin turistik.

“Këtu nuk bëhet fjalë vetëm për vezë, por për akte dhune barbare. Përpjekjet për ta kthyer Shqipërinë në skenarë dhune si ato të viteve 1997, 1998 nuk do të kenë sukses. I gjithë synimi është të dëmtohet sezoni turistik dhe ekonomia turistike e vendit”, u shpreh Balla.