Kreu i Partisë Demokratike, Sali Berisha, ka reaguar pas protestës së zhvilluar një ditë më parë para Kryeministrisë, duke publikuar një video nga momentet e përplasjes mes protestuesve dhe policisë.

Në pamjet e shpërndara, sipas Berishës, dëgjohet një shtetas i huaj i pranishëm në protestë, i cili i drejtohet forcave të rendit duke pyetur përse po sillen në atë mënyrë me qytetarët.

“Dhuna policore habit edhe shtetasin e huaj që ndodhet rastësisht në protestë! Dëgjohet teksa i thotë policisë pse silleni kështu”, shkruan Berisha.

Ai ka përdorur një gjuhë të ashpër ndaj efektivëve, duke i cilësuar si “gangsterë me uniformë”, ndërsa ka denoncuar përdorimin e forcës ndaj protestuesve, të cilët i përshkruan si paqësorë.

Në reagimin e tij, Berisha ndalet edhe te përdorimi i mjeteve të shpërndarjes së turmës, duke pretenduar se ndaj qytetarëve është përdorur edhe spraj me intensitet të lartë.

Protesta e opozitës para Kryeministrisë u shoqërua me tensione dhe ndërhyrje të policisë, ndërsa palët kanë dhënë versione të ndryshme mbi atë që ndodhi në terren.