Një ngjarje e rëndë është regjistruar në Treviso, Itali, ku një 68-vjeçar italian ka humbur jetën pas plagëve të marra në një aksident rrugor të ndodhur një javë më parë.

Viktima, Ettore Parisi, ndërroi jetë në spitalin Ca’ Foncello, ku ndodhej në gjendje kritike që prej përplasjes së ndodhur më 10 prill në zonën Ponte di Piave.

Sipas mediave italiane, aksidenti ndodhi në Piazza Garibaldi, ndërsa i moshuari po kalonte rrugën kur u godit nga një automjet tip SUV.

Shoferi i mjetit, një 42-vjeçar shqiptar, banues në të njëjtën zonë, është vënë nën hetim nga autoritetet italiane. Ai dyshohet se drejtonte një Hyundai Tucson në momentin e përplasjes.

Prokuroria e Trevisos ka hapur procedim për “vrasje nga pakujdesia në aksident rrugor”, ndërsa hetimet vijojnë për të përcaktuar rrethanat e sakta të ngjarjes, përfshirë edhe nëse viktima ndodhej në vijat e këmbësorëve në momentin e aksidentit.

Ngjarja ka shkaktuar reagime në komunitetin lokal, ndërsa autoritetet po analizojnë pamjet dhe dëshmitë për të rindërtuar plotësisht dinamikën e aksidentit.