Blake Lively është rikthyer sërish në vëmendjen e mediave ndërkombëtare, vetëm pak javë pasi mbylli zyrtarisht konfliktin ligjor me aktorin dhe regjisorin Justin Baldoni lidhur me filmin “It Ends With Us”.

Aktorja e njohur e serialit “Gossip Girl” u shfaq të martën në një event luksoz të organizuar nga Fendi në New York, ku u prezantua koleksioni “Baguette® 26424 Re-Edition”. Lively pozoi për fotografët në ambientet e dyqanit në Madison Avenue, duke tërhequr vëmendjen me paraqitjen e saj elegante dhe të relaksuar.

38-vjeçarja kishte zgjedhur një stil klasik: xhinse të zeza, body të zi dhe një pallto bezhë, të kombinuara me taka të zeza dhe një çantë Fendi. Sipas mediave amerikane, ajo qëndroi më gjatë se shumica e të ftuarve VIP, duke provuar disa aksesorë të markës dhe duke bashkëvepruar me të pranishmit.

Burime nga eventi thanë se aktorja ishte në humor të mirë, bisedoi me fansat dhe realizoi fotografi me ta. Në të njëjtin event ishte e pranishme edhe Olivia Wilde, me të cilën Lively kaloi një pjesë të mbrëmjes.

Dalja e saj publike vjen pak më shumë se dy javë pas përfundimit të procesit gjyqësor me Baldoni, të cilin ajo e kishte akuzuar për ngacmim seksual gjatë xhirimeve të filmit.

Sipas raportimeve, megjithëse palët nuk përfituan financiarisht nga marrëveshja, ekipet ligjore të tyre kanë arkëtuar rreth 60 milionë dollarë gjatë gjithë procesit.

Pas përfundimit të çështjes, Lively bëri edhe një paraqitje surprizë në Met Gala, një lëvizje që shihet si sinjal i rikthimit të saj të fortë në Hollywood. Ajo pritet të rikthehet në ekran me projekte të reja si “The Survival List” dhe adaptimi i romanit “The Husband’s Secret”.