Gjykata e Posaçme kundër Korrupsionit dhe Krimit të Organizuar (GJKKO) ka dënuar ish-kryetaren e komanduar të Bashkisë Tropojë, Zyra Islamaj, me 2 vite e 1 muaj burg për veprën penale të korrupsionit pasiv.

Sipas vendimit të gjykatës, dënimi me burg do të konvertohet në 2 vite shërbim prove, me kusht që ajo të mos kryejë vepra të tjera penale gjatë kësaj periudhe.

Po ashtu, GJKKO i ka hequr Islamajt të drejtën për të ushtruar funksione publike për një periudhë 5-vjeçare.

Për të njëjtën çështje është dënuar edhe ndërtuesi Rrok Gega me 6 muaj burg, dënim i cili është pezulluar dhe është zëvendësuar me 1 vit shërbim prove, për veprën e korrupsionit aktiv.

Sipas dosjes hetimore të SPAK, rasti lidhet me një tender publik, ku Islamaj dyshohet se i ka kërkuar ndërtuesit ndërtimin e një ure pranë banesës së një familjareje të saj, ndërtim i cili nuk ishte parashikuar në projektin fillestar.