Artan Tafani ka dhënë dëshmi tronditëse në gjyqin ndaj grupit kriminal të Laert Haxhiu, duke treguar dinamikën e vendosjes së tritolit në biznesin e reperit Noizy.

Sipas Tafanit, gjithçka nisi pas konfliktit mes Kleviol Ahmetajt dhe Noizyt, fillimisht në rrjetet sociale dhe më pas fizikisht në Durrës.

“Ka ndodhur ato ditë një sherr, është zënë Kleviol Ahmetaj me Noizyn. Fillimisht në TikTok, pastaj fizikisht në Durrës janë goditur. Klevioli me Laertin njihen familjarisht, janë shokë. Nuk i erdhi mirë Laertit që e rrahën Kleviolin në atë mënyrë”, deklaroi Tafani.

Ai tregoi se pas konfliktit, familjarët e Kleviolit kishin kontaktuar Laert Haxhiun, ndërsa më pas u mor vendimi për sulmin me tritol.

“Nëna e Kleviolit dhe motra morën në telefon Laertin. Ata pyesnin si e rrahën kështu. Laerti u vu në siklet. ‘Çohuni’, tha, ‘shkoni vijini tritol’. E kishim tritolin në shtëpi që e mbanim, një kile e pak”, u shpreh Tafani.

I penduari i drejtësisë rrëfeu edhe mënyrën si u organizua ngjarja.

“I bashkova unë, i ngjita me ngjitës. Rreth orës 02:30 u nisëm. Ishim me Lulzim Spahinë dhe Laertin. Morëm benzin e zi që kishim marrë te Casa Nova, i hoqëm targat dhe i vumë targat e makinës sime, sepse makina ime ishte në kërkim në atë kohë”, tha ai.

Sipas dëshmisë, pasi mbërritën pranë biznesit të Noizyt, Tafani nuk po gjente hyrjen e lokalit dhe komunikoi sërish me Laert Haxhiun përmes Lulzim Spahisë.

“Lokali i Noizyt ishte në kat të dytë dhe i hapur. S’po gjeja dot shkallët. Kthehem te makina dhe i them që s’po i gjej. Lulzimi komunikoi me Laertin. Pastaj thamë ta vendosnim poshtë, te dera e dyqanit të rrobave. Na thanë vendoseni aty”, deklaroi Tafani.

Ai shtoi se pasi ndezi fitilin, u larguan me shpejtësi nga vendi i ngjarjes.

“E ndeza fitilin dhe ika te makina. Pasi ikëm disa metra dëgjuam shpërthimin. I shkruajtëm Laertit që e vumë dhe shpërtheu, pastaj u kthyem në shtëpi”, përfundoi ai.