Një tentativë për vjedhjen e një automjeti është parandaluar nga Policia në Dhërmi, ndërsa në pranga kanë rënë një 25-vjeçar dhe një 17-vjeçare, të dyshuar si bashkëpunëtorë.

Sipas njoftimit zyrtar, shërbimet e Policisë reaguan menjëherë pas marrjes së informacionit për vjedhjen e një automjeti tip “Land Rover”, duke bërë të mundur lokalizimin dhe ndalimin e tij në kohë.

Gjatë ndërhyrjes, drejtuesja e automjetit nuk iu bind urdhrave të Policisë dhe, në përpjekje për t’u larguar, shkaktoi dëmtime në mjetin e vjedhur.

Nga hetimet rezulton se 25-vjeçari është arrestuar për veprat penale “Vjedhje e mbetur në tentativë”, “Mosbindje ndaj urdhrit të Policisë” dhe “Largim nga vendi i aksidentit”. Ndërsa 17-vjeçarja akuzohet për “Vjedhje e mbetur në tentativë”, “Drejtim të parregullt të mjetit”, “Shkatërrim të pronës” dhe “Mosbindje ndaj urdhrit të Policisë”.

Sipas Policisë, dy të rinjtë kishin shkuar në Dhërmi me një automjet tip “Benz”, fillimisht me qëllim blerjen e mjetit. Duke përfituar nga mungesa e pronarit, 17-vjeçarja e kishte marrë automjetin pa leje dhe ishte larguar.

Në cilësinë e provës materiale janë sekuestruar dy automjetet, ndërsa hetimet vijojnë për zbardhjen e plotë të rrethanave.