Një aksident i rëndë automobilistik është regjistruar pasditen e kësaj të premte në zonën e Udenisht, në Pogradec.

Sipas informacioneve paraprake, një automjet i drejtuar nga një 24-vjeçare ka përplasur një këmbësor rreth 80 vjeç. I moshuari është transportuar fillimisht në spitalin e Pogradec dhe më pas drejt Spitalit të Traumës në Tiranë, ku ka ndërruar jetë disa orë më vonë si pasojë e plagëve të marra.

Policia bën me dije se ngjarja ka ndodhur më 1 maj 2026, rreth orës 14:15, në aksin rrugor “Pogradec–Qafë Thanë”, pranë fshatit Udenisht. Automjeti me drejtuese shtetasen E. S., 24 vjeçe, dyshohet se ka përplasur këmbësorin 80-vjeçar, banues në këtë zonë.

Sipas burimeve nga grupi i ekspertëve të qarkullimit rrugor, drejtuesja e mjetit po udhëtonte nga Qafë Thana në drejtim të Pogradec, ndërsa i moshuari ka tentuar të kalojë rrugën në momentin e përplasjes.

Policia ka arrestuar në flagrancë 24-vjeçaren për veprën penale “Shkelja e rregullave të qarkullimit rrugor”, ndërsa materialet procedurale i janë referuar Prokurorisë së Korçë për veprime të mëtejshme.