Do Kwon, bashkëthemeluesi i “Terraform Labs”, është shpallur fajtor dhe u dënua me 15 vite burg nga një gjykatë federale në Manhatan, pas akuzave për mashtrim që çuan në kolapsin e stablecoin-it TerraUSD dhe humbje prej rreth 40 miliardë dollarësh për investitorët.

Gjatë seancës, gjyqtari Paul A. Engelmayer e përshkroi rastin si “një mashtrim epik”, duke theksuar se Kwon manipuloi investitorët që i kishin besuar kursimet e tyre të jetës. 34-vjeçari pranoi fajësinë për komplot dhe mashtrim me telekomunikacion, si dhe për deklarata të rreme mbi TerraUSD, që kishte për detyrë të mbante vlerën 1 dollar, por dështoi duke shkaktuar kolapsin e tregut.

Në fjalën e tij në gjykatë, Kwon kërkoi ndjesë për investitorët që humbën shuma të mëdha, përfshirë një person që humbi deri në 500 mijë dollarë. Prokuroria kërkoi një dënim të ashpër, ndërsa mbrojtja sugjeroi 5 vite burg, me shpresën që Kwon të mund të ekstradohej më pas në Korenë e Jugut për akuza të tjera.

Përveç dënimit penal, Kwon ra dakord në një marrëveshje civile me Komisionin Amerikan të Letrave me Vlerë (SEC) për të paguar një gjobë prej 80 milionë dollarësh dhe për t’i ndaluar aktivitetet në tregun e kriptomonedhave. Rasti i tij konsiderohet një nga skandalet më të mëdha financiare në botën e kriptomonedhave dhe ka tronditur komunitetin global të investitorëve.