Një debat është regjistruar në mbledhjen e Këshillit Kombëtar të Partisë Demokratike, menjëherë pasi kryetari i PD-së, Sali Berisha, përfundoi leximin e listës së kandidatëve për zgjedhjet e brendshme të partisë.

Ish-kandidatja për deputete dhe anëtarja e Këshillit Kombëtar, Ilirjana Kuçanaj, ndërhyri duke akuzuar drejtuesit e mbledhjes për mosrespektim të statutit dhe ngriti shqetësimin për një rezolutë që, sipas saj, ishte depozituar në kohë, por nuk ishte marrë në shqyrtim.

Debati u zhvillua si më poshtë:

Ilirjana Kuçanaj: “Ka një kërkesë që e kam depozituar 24 orë para. Ne jemi anëtarë të Këshillit Kombëtar. Të lutem respektoje statutin, mos e nis detyrën në shkelje të statutit.”

Kryetarja e Këshillit: “Ka rend dite, do të zbatohet rendi i ditës.”

Sali Berisha: “Lërmë të flas. Paraqitja e rezolutave ka rregullin e vet. Do kesh të drejtë ta paraqesësh sa herë të duash, por sipas rregullit. Nuk mund ta shkruajmë statutin ne këtu.”

Kuçanaj vijoi me kritikat e saj, duke pretenduar se statuti ishte shkelur që në fazën e hartimit të listave.

Ilirjana Kuçanaj: “Statutin e ke shkelur që në momentin që kemi shtuar 37 emra… Të rikandidojmë Flamur Nokën sekretar të përgjithshëm?”

Përplasja u zhvillua në prani të anëtarëve të Këshillit Kombëtar, ndërsa mbledhja vijoi më pas me rendin e ditës të përcaktuar nga drejtuesit e forumit.