Rezistenca popullore ka hyrë në ditën e saj të 46-të, ndërsa qytetarët e mbledhur në shesh shprehen të vendosur për të vijuar protestën, duke deklaruar se nuk do të tërhiqen.

Gjatë tubimit, një prej protestuesve mori fjalën, duke vlerësuar rolin e të rinjve në organizimin dhe vazhdimësinë e protestës.

“Të rinjtë na kanë hequr frikën shqiptarëve për të qëndruar këtu në protestë për 46 ditë”, u shpreh ai, duke theksuar se angazhimi i brezit të ri ka qenë vendimtar në këtë qëndresë.

Më pas, qytetari lëshoi akuza të forta në adresë të kryeministrit Edi Rama dhe qeverisë.

“Nuk mund të rri pa përmendur kryeministrin Edi Rama. Ai del me deputetët e tij dhe i quan protestuesit korba, sorra, e të tjerë. Ai dhe qeveria e tij janë një çetë hajdutësh dhe të ngordhur”, deklaroi protestuesi gjatë fjalës së tij.

Protesta vijon prej 46 ditësh, ndërsa organizatorët kanë bërë të ditur se do të vazhdojnë mobilizimin edhe në ditët në vijim.