Kryeministri Edi Rama ka prezantuar një program të ri qeveritar për mbështetjen e sipërmarrjes, të quajtur “Dyfisho ndërmarrjen tënde”, gjatë podcastit “Flasim”.

Nisma, që po përgatitet në bashkëpunim me Banka e Shqipërisë dhe bankat e nivelit të dytë, synon të lehtësojë aksesin në financim për bizneset e vogla dhe të mesme në vend.

Sipas Ramës, programi parashikon ofrimin e kredive me kushte më të favorshme se ato të tregut, të mbështetura edhe nga garancia shtetërore, me qëllim nxitjen e rritjes dhe zgjerimit të aktivitetit ekonomik.

Përfitues do të jenë bizneset ekzistuese që kërkojnë të zhvillohen, njësitë prodhuese, si dhe startup-et që synojnë të kthehen në kompani më të mëdha dhe më konkurruese në treg.

Programi pritet të nisë së shpejti zbatimin dhe konsiderohet si një ndër ndërhyrjet kryesore për të mbështetur sipërmarrjen dhe për të kapërcyer vështirësitë që bizneset hasin në sigurimin e financimit nga sistemi bankar.