Policia e Shtetit ka vijuar operacionin e koduar “Fati i Lojërave”, duke goditur aktivitetin e paligjshëm të lojërave të fatit në qytetin e Kavajë.

Gjatë kontrolleve të ushtruara në lagjen nr. 1 dhe lagjen nr. 6, uniformat blu zbuluan dy ambiente të përshtatura për organizimin e lojërave të fatit, ku ishin instaluar makina elektronike për këtë aktivitet të kundërligjshëm.

Në total, janë sekuestruar 16 makina lojërash fati, konkretisht 5 në një ambient dhe 11 në tjetrin.

Në lidhje me rastin, policia ka shpallur në kërkim dy shtetas, të moshave 26 dhe 20 vjeç, të cilët dyshohet se kishin marrë me qira ambientet ku zhvillohej aktiviteti i paligjshëm.

Autoritetet bëjnë me dije se vijon puna për kapjen e tyre, si dhe për dokumentimin e plotë të kësaj veprimtarie, ndërsa materialet procedurale i janë referuar Prokurorisë së Durrësit për veprime të mëtejshme.

Operacionet dhe kontrollet në terren pritet të vijojnë, me fokus goditjen e lojërave të fatit të paligjshme në të gjithë vendin.