Këngëtari i grupit të njohur West Side Family, Armir Shahini, ka folur së fundmi për eksperiencën e tij në “Big Brother VIP Albania 5”, raportet me ish-banorët dhe jetën pas daljes nga formati televiziv.

Ai u shpreh se rrugëtimi brenda shtëpisë ka qenë intensiv dhe me ndikim të madh si në karrierë ashtu edhe në jetën personale, ndërsa theksoi se vëmendja e publikut ka vijuar edhe pas përfundimit të spektaklit.

Shahini tregoi se pas daljes nga reality show është fokusuar në projekte të reja muzikore dhe rikthimin në jetën normale, duke u përshtatur me një realitet krejt tjetër nga ai i izolimit televiziv.

I pyetur për marrëdhëniet me ish-banorët, ai u shpreh se nuk ka pasur kontakte me disa prej tyre, duke theksuar se gjithçka që ka ndodhur brenda shtëpisë e konsideron të mbyllur.

“Jo, asnjëherë. Nuk di gjë. Ku urrej unë?! Unë jam njerëzor, jam babaxhan. Ja Elona më njeh”, tha ai, duke nënvizuar se nuk mban hatërmbetje.

Në vijim, i pyetur nëse do të pranonte të ishte pjesë e një emisioni ku do të përballej me disa ish-banorë, Shahini u shpreh i hapur për çdo diskutim, por theksoi se raportet e BBV i konsideron të përfunduara.

“S’e kam problem. Çdo gjë që ka ndodhur në Big, e kam mbyllur dhe e kam lënë aty”, deklaroi ai.

Sa i përket marrëdhënies me një tjetër ish-banor, Rogertin, këngëtari u shpreh se nuk ka shoqëri të vazhdueshme, por janë takuar rastësisht në disa raste jashtë formatit.