Presidenti amerikan Donald Trump ka lëshuar një mesazh të ashpër ndaj Iranit, duke deklaruar se Teherani duhet të zgjedhë mes nënshkrimit të një marrëveshjeje ose përballjes me pasoja të rënda nga Shtetet e Bashkuara.

Gjatë një fjalimi në ceremoninë e diplomimit në Akademinë e Rojës Bregdetare të SHBA-së, Trump tha se kapacitetet ushtarake të Iranit janë goditur rëndë dhe, sipas tij, janë shkatërruar pothuajse plotësisht.

“Gjithçka është shkatërruar. Marina e tyre është shkatërruar. Forca ajrore e tyre është shkatërruar. Pothuajse gjithçka. Pyetja e vetme është nëse do të shkojmë ta përfundojmë punën apo nëse ata do të nënshkruajnë një marrëveshje. Do të shohim çfarë do të ndodhë”, deklaroi ai.

Trump theksoi gjithashtu se Shtetet e Bashkuara kanë opsionin për të ndërhyrë sërish, duke lënë të hapur mundësinë e përshkallëzimit të situatës në rast se nuk arrihet një marrëveshje me Teheranin.

Deklaratat e tij vijnë në një moment tensionesh të vazhdueshme mes Uashingtonit dhe Teheranit, ku diplomacia dhe kërcënimet ushtarake kanë qenë shpesh paralelisht të pranishme në diskursin politik amerikan.