Një tragjedi e rëndë ka tronditur pushuesit në Milano Marittima, në bregdetin e Ravenës, Itali, ku një vajzë 4-vjeçare nga Austria humbi jetën pasi u mbyt në pishinën e një hoteli.

Babai i vogëlushes është vendosur nën hetim nga Prokuroria e Ravenës, me dyshimin për braktisje të një fëmije.

Sipas hetimeve paraprake të karabinierëve, ai i kishte kërkuar vajzës së tij të priste në një zonë mes këndit të lojërave dhe pishinës, ndërsa ishte larguar për pak minuta, dyshohet për të marrë diçka në dhomën e hotelit. Kur u kthye, situata ishte bërë tragjike dhe përpjekjet për ta shpëtuar nuk dhanë rezultat.

Pamjet e kamerave të sigurisë kanë ndihmuar hetuesit në rindërtimin e ngjarjes. Sipas tyre, vogëlushja është parë duke ecur e vetme drejt pishinës, ndërsa më pas zhduket nga pamja në një zonë më të errët. Dyshohet se ajo ka qëndruar në ujë për rreth 7-8 minuta përpara se të vihej re nga personat që ndodheshin aty pranë.

Një mjek, që ndodhej rastësisht në hotel, ka ndërhyrë menjëherë për t’i dhënë ndihmën e parë, ndërsa babai mbërriti pak çaste më vonë.

Sipas rindërtimit të deritanishëm, dy fëmijë të vegjël ishin të parët që vunë re se diçka nuk shkonte. Ata panë portën e pishinës të hapur, hynë brenda dhe dalluan trupin e vogëlushes në ujë, duke dhënë menjëherë alarmin.

Familja austriake ndodhej në rivierën italiane për pushime dhe kishte planifikuar të kthehej në Austri më 19 korrik. Magdalena ishte me prindërit dhe dy motrat e saj më të mëdha.

Hetuesit po verifikojnë edhe kushtet e sigurisë në zonën e pishinës. Sipas informacioneve paraprake, në momentin e ngjarjes, rreth orës 14:00, nuk kishte roje shpëtimi në shërbim, ndërsa hyrja e pishinës ishte e hapur.

Prokuroria ka nisur procedimin penal, duke shqyrtuar edhe hipotezën e vrasjes nga pakujdesia. Një autopsi pritet të kryhet në ditët në vijim për të përcaktuar shkaqet e sakta të vdekjes, ndërsa pishina e hotelit është sekuestruar me urdhër të prokurorisë.