39-vjeçari i shpallur në kërkim ndërkombëtar do të vuajë masën e sigurisë “Arrest në burg” e caktuar nga Gjykata e Posaçme Kundër Korrupsionit dhe Krimit të Organizuar.

Artikulli:

Anëtari i një grupi kriminal që trafikonin lëndë narkotike nga Shqipëria drejt vendeve të Bashkimit Europian, Emri Hysenaj, është ekstraduar nga Italia në vendin tonë.

Sipas policisë, 39-vjeçari ishte i shpallur në kërkim ndërkombëtar dhe Gjykata e Posaçme Kundër Korrupsionit dhe Krimit të Organizuar (GJKKO) i kishte caktuar masën e sigurisë “Arrest në burg”, për veprën penale “Trafikimi i lëndëve narkotike”, kryer në kuadër të grupit të strukturuar kriminal të njohur si Troplinët.

Autoritetet shqiptare bëjnë me dije se gjatë vitit 2021, Hysenaj ka trafikuar lëndë narkotike nga Shqipëria drejt vendeve të Europës, për llogari të grupit kriminal.

Ekstradimi u realizua pas një bashkëpunimi të ngushtë mes specialistëve të Drejtorisë së Interpolit dhe homologëve të Interpol Romës, duke finalizuar procedurat ligjore për rikthimin e shtetasit shqiptar në Shqipëri.

Në muajin prill të vitit 2025, GJKKO-ja kishte vendosur arrest në burg për Hysenajn, duke e konsideruar pjesëtar të një grupi të strukturuar kriminal dhe duke ngritur akuza serioze për trafikimin e lëndëve narkotike.