Kreu i komanduar i Shërbimit Informativ të Shtetit, Elvis Lila, ishte i pranishëm sot në mbledhjen e Këshillit të Sigurisë Kombëtare, të thirrur nga presidenti Bajram Begaj.

Në pamjet e publikuara nga zyra e shtypit e Presidentit, shihet edhe Lila, duke shënuar kështu daljen e tij të parë në publik në këtë detyrë.

Elvis Lila u komandua në krye të SHISH pas shkarkimit të Vlora Hysenit nga kryeministri Edi Rama.

Lila është një oficer karriere me rreth 20 vite eksperiencë në SHISH. Gjatë karrierës së tij në shërbimin inteligjent, ai ka mbajtur disa detyra drejtuese në struktura të ndryshme të institucionit.

Gjatë periudhës kur SHISH drejtohej nga Helidon Bendo, Lilës iu besua drejtimi i një strukture të re, të njohur si Drejtoria e Performancës. Më pas, ai ka drejtuar edhe strukturën e kundërzbulimit.

Me marrjen e drejtimit të SHISH nga Vlora Hyseni, rreth tre vite më parë, Lila u emërua drejtor i departamentit që mbulonte çështjet operacionale.

Lila ka qenë një prej bashkëpunëtorëve të afërt të Hysenit, veçanërisht në çështjet që lidhen me kundërzbulimin.