Aktori britanik Stephen Graham ka folur hapur për një nga periudhat më të vështira të jetës së tij, duke rrëfyer se në fillim të të 20-ave kishte tentuar t’i jepte fund jetës, teksa përballej me një depresion të rëndë.

Në atë kohë, Graham ishte larguar nga vendlindja e tij, Kirkby, për të ndjekur shkollën e dramës në Londër. Paralelisht, ai po përjetonte edhe disa ngjarje të dhimbshme familjare, mes tyre abortin spontan të nënës dhe humbjen e gjyshes.

Në një intervistë për “The Times”, aktori 53-vjeçar tha se beson se një fuqi më e lartë e kishte shpëtuar. Graham pranoi se gjatë asaj periudhe ndihej i humbur dhe nuk dinte se si t’i përballonte vështirësitë me të cilat po përballej.

Pas kësaj periudhe, familja dhe këshillimi luajtën një rol të rëndësishëm në rikuperimin e tij. Graham ka treguar se sot mbështetet te meditimi, reiki dhe ushtrimet e përditshme, duke thënë se ka ndërtuar një bazë më të fortë dhe një ndjenjë më të qëndrueshme për veten.

Një rol të rëndësishëm në jetën e aktorit ka pasur edhe bashkëshortja e tij, Hannah Walters, të cilën e kishte njohur në shkollën e dramës.

Graham ka treguar më herët se Walters qëndroi pranë tij pas asaj periudhe të vështirë dhe se marrëdhënia e tyre u shndërrua gradualisht në dashuri.

Çifti u martua në vitin 2008 dhe kanë dy fëmijë, Alfie dhe Grace.