Kryeministri Edi Rama ka reaguar pas protestës kundër projektit në Zvërnec, gjatë së cilës një grup protestuesish u ndalën edhe para selisë së Partia Socialiste e Shqipërisë, duke artikuluar thirrje dhe fjalë fyese ndaj tij.

Përmes një postimi në rrjetet sociale, Rama ndau një video nga momenti i protestës, duke i cilësuar protestuesit si “mysafirët e paftuar të natës” në selinë e PS.

“Fali Zot se s’dinë se ç’bëjnë, thuhet në këto raste”, shkroi kreu i qeverisë, ndërsa shoqëroi reagimin me kritika të forta ndaj retorikës së përdorur nga protestuesit.

Në postimin e tij, Rama bëri edhe një krahasim historik, duke deklaruar se slogane të tilla si “Shqipëria e shqiptarëve” i kujtojnë parullat nacionaliste që, sipas tij, çuan në tragjedi të mëdha në Europë.

Postimi i Ramës:

“MYSAFIRËT E PAFTUAR TË NATËS NË SELINË E PARTISË SOCIALISTE

‘Shqipëria e shqiptarëve’ dhe këto çeta kinse shqiponjash që ulërasin kësisoj rrugëve, të kujtojnë ‘Gjermaninë e gjermanëve’ me ata ulëritësat e verbër si këta mysafirët e natës tek selia e PS, që e kthyen Gjermaninë në thertoren e hebrenjve dhe e katandisën në delen e zezë të planetit.”

Reagimi i kryeministrit vjen në një moment kur debati mbi projektin në Zvërnec vijon të mbetet në qendër të vëmendjes publike, mes protestave të banorëve, aktivistëve dhe polemikave politike.