Aktorja dhe komediania e njohur amerikane Amy Schumer ka konfirmuar ndarjen nga bashkëshorti i saj, Chris Fischer, duke i dhënë fund zyrtarisht martesës së tyre pas shtatë vitesh bashkëjetesë.

Lajmi u bë publik të premten, më 12 dhjetor, përmes një postimi në Instagram, ku Schumer publikoi një foto me Fischerin të realizuar në metronë e New York-ut. Në mesazhin shoqërues, ajo bëri të ditur se vendimi ishte i vështirë, por i marrë me mirëkuptim dhe respekt të ndërsjellë.

“Unë dhe Chris kemi marrë vendimin e vështirë për t’i dhënë fund martesës sonë pas 7 vitesh. E duam shumë njëri-tjetrin dhe do të vazhdojmë të përqendrohemi në rritjen e djalit tonë. Familje përgjithmonë”, shkroi Schumer, duke kërkuar gjithashtu respektimin e privatësisë.

Çifti nisi lidhjen në vitin 2017, u martua në vitin 2018 dhe në vitin 2019 u bënë prindër të një djali, Gene. Pavarësisht ndarjes, Schumer theksoi se raporti mes tyre mbetet miqësor dhe se prioritet absolut do të jetë mirëqenia e fëmijës së tyre.

Ndarja vjen rreth një muaj pasi aktorja fshiu të gjitha fotot e vjetra nga profili i saj në Instagram, përfshirë ato me Fischerin, veprim që nxiti spekulime në rrjet. Megjithatë, Schumer sqaroi se kjo nuk kishte lidhje me pamjen apo jetën e saj personale, duke ruajtur edhe në këtë rast stilin e saj karakteristik plot humor.