Një denoncim shqetësues është publikuar ditën e sotme lidhur me parkimin e paligjshëm në zonën e Bulevardit të Ri në Tiranë, pranë një sheshi që shërben si hapësirë publike për fëmijët.

Sipas një qytetari, kjo zonë është kthyer në mënyrë të paligjshme në parking, ku disa persona, që ai i cilëson si “të fortë të shtetit”, parkojnë automjetet e tyre duke vendosur tabela policie në xham, çka bën që të mos gjobiten apo ndëshkohen nga autoritetet.

Denoncuesi shprehet se, pavarësisht shkeljes së hapur të ligjit, as Policia Bashkiake dhe as Policia e Shtetit nuk ndërhyjnë për të liruar hapësirën publike, duke lejuar vijimin e situatës.

Ai thekson se kjo është veçanërisht e rrezikshme, pasi sheshi përdoret nga fëmijët për të luajtur dhe zënia e tij nga automjetet rrezikon sigurinë e tyre çdo ditë, ndërsa ligji, sipas tij, zbatohet vetëm për qytetarët e zakonshëm.

“Ju lutem, nëse e postoni te hyrja e parkingut të Bulevardit të Ri, te sheshi që është hapësirë publike ku lozin fëmijët, e kanë kthyer në parking këta ‘të fortit e shtetit’ që vendosin tabela policie në xham dhe nuk gjobiten asnjëherë, as nga Policia Bashkiake, as nga Policia e Shtetit”, – shprehet qytetari në denoncimin e tij.

Deri më tani nuk ka pasur një reagim zyrtar nga autoritetet për këtë rast.