Atmosfera në Santiago Bernabéu mbetet e tensionuar. Vetëm pak ditë pas eliminimit nga UEFA Champions League kundër Bayern Munich, Real Madrid u përball me reagimin e ashpër të tifozëve, edhe pse arriti të fitojë 2-1 ndaj Deportivo Alavés.
Në shënjestër ishte veçanërisht Kylian Mbappé, i cili u prit me fishkëllima që në nxehje dhe në çdo prekje të topit. Sulmuesi francez reagoi duke shënuar golin e tij të 41-të sezonal, por festimi i tij ishte i ftohtë dhe pa kontakt me tifozët, një tregues i qartë i tensionit.
Situata nuk ishte më e mirë për Vinícius Júnior, i cili u fishkëllye gjatë gjithë ndeshjes, pavarësisht golit të shënuar. Braziliani reagoi duke kërkuar falje me gjest ndaj tribunave gjatë festimit.
Edhe Eduardo Camavinga u përball me kritika, sidomos për shkak të kartonit të kuq të marrë në ndeshjen ndaj Bayernit, ndërsa futja e tij në lojë u shoqërua me reagime negative.
Një moment i veçantë ishte edhe ai i talentit argjentinas Franco Mastantuono, i cili u prit me fishkëllima të forta kur hyri në fushë në vend të Arda Güler.
Pavarësisht fitores, klima në “Bernabéu” tregon se presioni ndaj skuadrës madrilene mbetet i lartë pas zhgënjimit në Evropë.
