Një zjarr ka përfshirë katin e tretë të një pallati në qytetin e Burrelit, duke shkaktuar dëme materiale, por fatmirësisht pa pasoja në njerëz.

Sipas informacioneve paraprake, ngjarja ka ndodhur në një nga pallatet e lagjes “Drita”, pranë shkollës 9-vjeçare “Mustafa Gjestila”. Menjëherë pas njoftimit, në vendngjarje kanë mbërritur forcat zjarrfikëse të Bashkisë Mat, të cilat kanë ndërhyrë për të vënë nën kontroll flakët dhe për të parandaluar përhapjen e tyre në apartamentet përreth.

Burime nga vendi i ngjarjes bëjnë me dije se zjarri dyshohet të ketë nisur fillimisht në një nga dhomat e banesës, ndërsa shkaqet e sakta mbeten ende të paqarta.

Falë ndërhyrjes së shpejtë të zjarrfikësve, flakët janë izoluar në kohë, duke shmangur rrezikun për banorët e tjerë të pallatit. Si pasojë janë shkaktuar vetëm dëme materiale.

Autoritetet po punojnë për të zbardhur rrethanat dhe shkakun e plotë të zjarrit.