Përmes një mesazhi të shoqëruar me dëshmi vizuale, një qytetar ka bërë publike pretendime lidhur me identitetin dhe rolin e disa personave, emrat e të cilëve janë përmendur pas operacionit të fundit të SPAK.

Sipas denoncuesit, në qendër të vëmendjes ndodhet Ardian Rama, nipi i të ndjerit Fatmir Rama, i njohur si “Miri i Xhikes”. Qytetari pretendon se, ndryshe nga sa mund të jetë perceptuar, vëllai i tij Erjon Rama ka pasur një rol dytësor.

Mesazhi i plotë i qytetarit:

“Përshëndetje si jeni! Kam fotografi të Adrian Ramës. Vëllai i vet, Erjon Rama, është thjesht figurant. Adriani është ai që i ka bërë pisllëqet dhe kam dhe fotografi kush është Adriani. Ndërsa ky tjetri është Elton Mehmeti, organizator gjithashtu bashkëpunëtor me Adrian Ramën.”

Sipas këtyre pretendimeve, në këtë skemë përmendet edhe emri i Elton Mehmetit, të cilin denoncuesi e përshkruan si organizator dhe bashkëpunëtor të ngushtë të Ardian Ramës.

Qytetari i referohet roleve të mëposhtme:

* Ardian Rama: Pretendohet si personi kryesor në aktivitetet e dyshuara.
* Erjon Rama: Përshkruhet nga denoncuesi si figurë dytësore.
* Elton Mehmeti: Identifikohet nga qytetari si organizator dhe bashkëpunëtor i Ardian Ramës.

Kujtojmë se SPAK ka lëshuar masa sigurie “arrest me burg” për vëllezërit Erjon dhe Ardian Rama, në kuadër të një operacioni kundër një grupi të strukturuar kriminal që, sipas hetimeve, dyshohet të drejtohej nga Luçiano dhe Abedin Koçeku.

Sipas autoriteteve, roli i dy vëllezërve Rama dyshohet të ketë qenë pastrimi i të ardhurave të përfituara nga aktivitetet e paligjshme të grupit kriminal.

Ndër pasuritë e sekuestruara në kuadër të hetimit përmenden:

* 7 vila në Palasë dhe 1.626.000 euro të përfituara nga shitja e tyre;
* 9 llogari bankare të Erjon Ramës;
* 21 llogari bankare të Ardian Ramës;
* Një pasuri në Sallmone të Shijakut dhe 58 milionë lekë të përfituara nga shitja e saj;
* Tre llogari të kompanisë “Kryeon.83”;
* 2 vila në Rolling Hills;
* Truall në Sarandë;
* 3 vila dhe 2 apartamente në Jalë;
* Kompania “Kryeon.83” me seli në Tiranë dhe Prishtinë.

Hetimet për këtë çështje vijojnë, ndërsa autoritetet pritet të hedhin më shumë dritë mbi rolet dhe përgjegjësitë e personave të përfshirë.

Sqarim: Pretendimet e mësipërme burojnë nga një denoncim qytetar dhe nuk përbëjnë konstatim fajësie. Çdo person prezumohet i pafajshëm deri në një vendim gjyqësor të formës së prerë.