Pas përfundimit të mbledhjes së kryesisë së Partisë Demokratike, deputeti Flamur Noka ka dalë para gazetarëve për të shpalosur axhendën e PD-së, duke konfirmuar protestën e 22 dhjetorit në “Bulevardin e Kombit”.

Gjatë konferencës, Noka u pyet lidhur me debatin brenda partisë dhe kërkesën e Ervin Salianjit për dorëheqjen e tij. Ai theksoi se largimi i tij do të ishte në dobi të qeverisë, duke shtuar se fokusimi i PD-së është te sfidat që përballen qytetarët.

“Unë po flas këtu për axhendën e demokratëve dhe të opozitarëve. Ju po flisni për agjenda jashtë partiake, të cilat janë në shërbim të qeverisë. Sot dorëheqja e vetme që kërkohet në këtë vend është dorëheqja e Edi Ramës. Asgjë tjetër nuk e stabilizon Shqipërinë dhe nuk qetëson shpirtrat e shqiptarëve”, deklaroi Noka.

Deputeti nënvizoi se prioriteti i PD-së mbetet mobilizimi dhe përfaqësimi i interesave të qytetarëve, duke shmangur përplasjet brenda partisë që mund t’i shërbenin qeverisë aktuale.