Një anëtar i një grupi të organizuar kriminal me origjinë shqiptare ka përfunduar në duart e drejtësisë në Skoci, pasi një detaj i vogël në një fotografi të dërguar prej tij ndihmoi policinë ta identifikonte.

Klodian Ferizolli u zbulua gjatë një hetimi ndaj një rrjeti kriminal me bazë në Glasgow, i përfshirë në trafik ndërkombëtar droge dhe përdorim të platformës së koduar EncroChat.

Sipas materialeve të paraqitura në gjykatë, 32-vjeçari përdorte pseudonimin “smoke-strong” dhe komunikonte rregullisht me bashkëpunëtorë të tjerë për aktivitetet e paligjshme.

Prokurori David Fisken i tha Gjykatës së Lartë në Glasgow:

“Policia arriti ta lidhte pseudonimin ‘smoke-strong’ me Ferizollin përmes një fotografie që ai kishte dërguar në EncroChat, e cila përputhej me modelin e pllakave të dyshemesë së banjës në adresën e tij”.

Hetimi tregoi se Ferizolli ishte i përfshirë në diskutime për ngritjen e një fabrike kanabisi dhe trafik droge në shkallë të gjerë, si dhe në qarkullimin e shumave të mëdha parash.

Në një tjetër komunikim, ai kishte dërguar edhe një foto të kartëmonedhave të mbështjella, ndërsa sipas prokurorisë kishte folur për borxhe që arrinin në 355.350 paund, prej të cilave kishte pranuar se kishte marrë rreth 239.680 paund.

Gjykata dëgjoi gjithashtu se Ferizolli kishte ofruar shitje kokaine me çmim 39.000 paund për kilogram.

Ai u ndalua fillimisht nga policia në maj 2020 në Baillieston, Glasgow, por nuk u arrestua menjëherë. Sipas prokurorisë, vetëm pak minuta pas largimit të policëve, ai kontaktoi bashkëpunëtorët duke i informuar për kontrollin dhe për faktin se kishte 15.000 paund me vete në makinë.

Ferizolli u akuzua zyrtarisht në vitin 2024 pasi u lidh përfundimisht me identitetin “smoke-strong” dhe u deklarua fajtor për pjesëmarrje në krim të organizuar.

Ai do të dënohet më 24 korrik në Kilmarnock, ndërsa gjykata ka urdhëruar që të mbahet në paraburgim deri në seancën e radhës.