Fotot prapa skenave të Michelle Obamës nga seti i realizuar nga Annie Leibovitz kanë shpërthyer në mediat sociale, duke ndezur një valë spekulimesh dhe komentesh për pamjen e saj fizike.

Ish-Zonja e Parë, 61 vjeç, publikoi në Instagram disa imazhe të realizuara nga fotografeja legjendare, duke i shoqëruar me fjalë vlerësimi për punën e saj.

“Annie Leibovitz gjithmonë e dinte se një foto mund të thotë diçka. Libri i saj ‘Women’ e ka bërë këtë, duke zgjeruar mënyrën si i shohim gratë,” shkroi Obama në postim, duke shtuar se ishte “nder” të pozonte sërish për të.

Por, në vend që të fokusoheshin tek mesazhi, një pjesë e rrjetit u përqendrua tek fiziku i saj. Në fotot ku Obama shfaqet me bluzë gri, xhinse dhe çizme lëkure, vëmendjen e të gjithëve e mori barku i saj dukshëm më i sheshtë dhe krahët e tonifikuara.

Kjo mjaftoi që në Twitter/X të shpërthenin aludimet se ish-Zonja e Parë mund të ketë përdorur Ozempic ose medikamente të tjera të grupit GLP-1 për humbje peshe.

“Ozempic – si të gjithë që papritmas vendosën të ‘shëndeteshin’,” shkroi një komentues.
“GLP-1, është e qartë. Ata kanë para, nuk kanë pse të lodhen me sigurime,” shtoi një tjetër.
“Do ta imagjinoja Ozempic. Është më e lehtë se dietat e rrepta,” komentoi dikush tjetër.

Në rrjet pati edhe zëra që kërkonin më shumë transparencë:
“Nuk po e kritikoj… por ji e sinqertë!”

Nuk ka asnjë konfirmim nga Michelle Obama apo nga stafi i saj për përdorimin e medikamenteve të tilla.

Megjithatë, në vitin 2022 ajo ka folur hapur për ndryshimet fizike gjatë menopauzës, duke treguar se kishte shtuar peshë dhe se e kishte ndjerë vështirësinë e jetës në atë fazë:

“Në menopauzë, ke një rritje të ngadaltë të peshës që as nuk e vëren… Vesh rroba elastike dhe më pas zbulon se ato të vitit të kaluar nuk të hyjnë më,” tha ajo për People.

Fotot e Leibovitz, të cilat synojnë të portretizojnë gratë moderne në forma të ndryshme, kanë hapur një diskutim të gjerë – mes admirimit për stilin dhe mesazhin e projektit, por edhe mes dyshimeve për presionet estetike tek figurat publike.

Debati vazhdon, ndërsa seti fotografik pritet të publikohet i plotë së shpejti.