Pas rreth dy javësh kërkime intensive, është gjetur një trup i pajetë që dyshohet se i përket 34-vjeçarit Eglant Koçi, i cili rezultonte i zhdukur prej ditësh në rrethana misterioze.

Sipas informacioneve paraprake, trupi është lokalizuar në një zonë rurale mes Tiranës dhe Elbasanit, në afërsi të fshatit Cerujë. Në vendngjarje ndodhen forca të Policisë së Shtetit dhe efektivë të RENEA-s, të cilët po punojnë për nxjerrjen e trupit dhe dokumentimin e plotë të provave.

Burime paraprake bëjnë me dije se ka qenë një dron i policisë ai që ka bërë të mundur lokalizimin e trupit në një humnerë, ku dyshohet se ishte hedhur pas krimit.

Eglant Koçi ishte raportuar i zhdukur rreth dy javë më parë, ndërsa hetimet u përqendruan te miku i tij, Armand Shakaj, i shpallur në kërkim nga autoritetet.

Sipas hetimeve, kamerat e sigurisë në ambientin ku dyshohet se Koçi është mbajtur peng dhe më pas është vrarë, kanë fiksuar Shakajn duke transportuar një çantë dhe qese të zeza me përmbajtje të dyshimtë. Hetuesit dyshojnë se në to mund të ketë qenë trupi i pajetë i 34-vjeçarit.

Më tej, sipas të dhënave të mbledhura nga grupi hetimor, Shakaj dyshohet se e ka transportuar trupin me automjetin e tij tip “Porsche”, ku mendohet se e ka mbajtur për më shumë se 24 orë. Më pas ai ka përdorur një karrotrec për të lëvizur automjetin deri në zonën e Ibës, duke pretenduar se makina kishte pësuar defekt.

Automjeti u sekuestrua më vonë nga policia, pasi ishte dërguar për t’u larë në një lavazh. Brenda tij u gjetën gjurmë të dyshuara gjaku, si dhe mjete pune, përfshirë lopata me baltë.

Autoritetet pritet të kryejnë ekspertizat mjeko-ligjore dhe analizat e ADN-së për të konfirmuar zyrtarisht identitetin e trupit të gjetur. Ndërkohë, kërkimet për kapjen e Armand Shakajt vijojnë, ndërsa hetuesit besojnë se zbulimi i trupit mund të sjellë zhvillime të rëndësishme në zbardhjen e plotë të ngjarjes.